اه من الهدايا !!

اه من الهدايا !!




آه من الهدايا
بقلم الدكتور محسن الصفار
دخل سعيد إلى شقته المتواضعة حيث يعيش هو و زوجته و أولادهما الثلاثة وتعجب لرؤية البيت مزينا وفيه أنواع الزهور وطاولة الطعام في وسط الغرفة وعليها صحون وملاعق وكل الدلائل الميدانية تشير الى وجود غزو اقصد حفلة قريبة في بيته , سلم على زوجته وسألها :
- شو حبيبتي خير ؟ شكلها فيه حفلة اليوم ؟
- ايه اكيد فيه حفلة لكان شايفني مزينة الشقة هيك كرمال الدوري الانجليزي لكرة القدم؟
- وشو مناسبة الحفلة ؟
- شو بك نسيت ان اليوم عيد ميلاد بنتك ؟
ضرب سعيد على جبينه وقال :
- الله يلعنك يا شيطان والله نسيت ليش الحياة ومشاكلها تخلي الواحد يتذكر شي ؟المهم مين جاي ؟
- ما حدا رفقاتها بالمدرسة مع اهلهن
- الله يعين , بلغتيهن انا ما نقبل هدايا من حدا ؟
- ايه والله باستحي ابن عمي يعني مو حلوة اقول للناس مابدنا من حدا هدية
- وليش تستحي ؟
- يقولو ان نحنا بنقول هيك لان بدنا هدية محرزة وغالية بتعرف الناس كيف بتفكر
- سبحان الله انا مابدي هدية يقومو يجيبو هدية غالية ؟
- يعني الناس هيك بتفكر
- امري لله بس يكون بعلمك انتي بتتحملي المسؤولية انا ما خصني
- ان شاء الله خير ابن عمي ما راح يصير شي
بدات حفلة عيد الميلاد وكل عائلة تدخل وبيدها هدية ولاحظ سعيد ان زوجته تراقب كل هدية كي تسجل في ذهنها من جلب ماذا وبعد الحفلة اسرعت بتسجيل كل الهدايا واسم العائلة التي جلبتها وكذلك القيمة التخمينية للهدية ضحك سعيد وقال :
- شو يا حبيبتي عم تحسبي قديه بدك تدفعي ضرايب على الهدايا ؟ شو ها اللوائح اللي عم تعمليها ؟
- أي ضرايب يا سعيد ؟ لازم نعرف قيمة كل هدية
- ليش بدك تبيعيهن ؟
- لا بس لازم نعرف كرمال اذا اللي جابها صار عنده مناسبة نجيب لهن شغلة بنفس القيمة احلى ما يزعلوا
- حلوة هاي شو رايك نوظف محاسب لهالشي ؟
- سعيد حاجتك تناقرني وقوم ساعدني بالهدايا
نهض سعيد وساعد زوجته باعداد لائحة الهدايا دون اقتناع , بعد عدة ايام خاطبته زوجته قائلة :
- سعيد بدي 5000 ليرة
- خير لشو ؟
- عيد ميلاد صديقتها لبنتك بعد يومين ولازم نجيب لها هدية
- وليش لازم تكون الهدية بخمس ألاف ليرة شو بدنا نخطبها ؟
- لان أهلها جابو لبنتك بعيد ميلادها سوار ذهب حقه على الاقل 5 ألاف ليرة
- ايه بسيطة رديه لهن السوار ونصير خالصين
- شو هالحكي يا سعيد بدك تجنني ؟ خلاص لازم نجيب هدية ب خمس ألاف
- يا حبيبتي إنا راتبي كله 10 ألاف أذا أعطيتك منن 5 ألاف للهدية بشو بدنا نعيش ؟ نبطل نأكل ولا ما ندفع إيجار البيت ؟
- ايه شو بدي اعمل ؟ والله عيبة كبيرة بحقنا ما نرد الهدية الناس تقول علينا بلا ذوق الله يخليك دبر حالك باي شكل
- ادبر حالي ؟ ليش هو انا اللي ورطت نفسي بهالشي ؟ قلتلك ما بدنا هدايا
- خلاص روح خد لك سلفة من شي مطرح
- من وين بدي اتسلف ؟ أي والله البنك الوحيد اللي ما اخذت منه قرض هو بنك الدم !!
- دبر حالك هاي بنتك وقيمتها من قيمتك
- احسن شي خدي هدية رفيقتها وبيعيها واشتري هدية الها بالمصاري
- يا عيب الشوم ابيع الهدية ؟ واذا سالو عنها شو بدي قللن ؟ بعناها ؟

ذهب سعيد واقترض المبلغ من احد أصدقاءه وأعطاه لزوجته كي تشتري الهدية ولكنه فوجئ بعد عدة أيام بان زوجته تطلب 3000 ليرة أخرى منه
- لشو بدك المصاري ؟
- والله واحدة ثانية من رفيقات بنتك صار عيد ميلادها وبدنا نجيب هدية !!
- انتي جنيتي ؟؟ شو بدي كل يوم أجيب هدية بخمس ألاف وثلاث ألاف ؟ شايفتني مليونير و مو عارف وين اودي المصاري ؟
- ايه شو بدنا نعمل ؟ شو العمل ؟ ما فينا ما نرد هدايا الناس
- مافينا نرد الهدايا بس فينا نفوت على الحبس بسبب الديون ؟ سبحان الله !! شو عاملينها بورصة تبادل الاسهم ؟ اليورصات وفلست كمان !!
وفجاة سكت سعيد وكان فكرة قد خطرت على باله وعاد الى الواقع على صوت زوجته :
- دبرني شو بدك تعمل ؟
- هلق بتشوفي
خرج سعيد من البيت وعاد ومعه علبة كبيرة مغلفة بشكل جميل ,تعجبت زوجته وقالت :
- شو هالهدية شكلها غالية ومحرزة ؟ اكيد كلفت كثير
- لا 50 ليرة علبة شوكولا و50 ليرة تغليف
- شو 50 ليرة ؟؟؟؟ كيف بدنا نعطي البنت هدية بخمسين ليرة واهلها جايبيين هدية بثلاث الاف؟
- لا فيها رسالة بداخلها
- رسالة شو ؟
- يؤسفنا أن نبلغكم بان القيمة السوقية لهديتكم في بورصة الهدايا والتي كانت 3000 ليرة قد انهارت بسبب الأزمة العالمية مثلها مثل بقية البورصات العربية وعليه فان هديتكم تعادل علبة الشوكولا هذه مثل ما أصبحت أسهم الشركات لا تساوي الورق أللذي طبعت عليه !!

وكل هدية وانتم بخير